ماذا يحدث بعد حفلة التخرج؟
أول حاجة، أثناء حفلة التخرج نفسها اسألوا على رابطة الخريجين.
في ناس بتوفر خدمة إنها تخلّصلك الإجراءات بدل ما تلف بنفسك بين الجهات المختلفة.
اعرف منهم التفاصيل والأسعار والخدمات اللي بيقدموها، لأن وقتها ممكن توفر على نفسك وقت ومجهود كبير جدًا.
أما لو هتمشي في الطريق الطويل بنفسك زي ما أنا عملت، فدي الخطوات كاملة من البداية للنهاية
استلام الشهادة وختم الأكاديمية
الشهادة بتوصلك من مقر الجامعة في إسكندرية، لكنها بتكون غير مختومة وغير ممضية.
بعد الحفلة مباشرة بتروح فرع الأكاديمية وتطلب:
- ختم الشهادة
- توقيع العميدة
وده بيكون على:
شهادة التخرج
بيان الدرجات
شهادة الماجستير الكاملة بالتقدير
وفي نفس الوقت بتبلغهم إنك محتاج #تعتمد الشهادة من المجلس الأعلى للجامعات.
ساعتها بيدوك ورقة، وتنزل تدفع في الخزنة (وقتها كانت الرسوم 567).
وبعد حوالي أسبوع تستلم:
الشهادة مختومة وممضاة
ورقة الاعتماد الخاصة بالمجلس الأعلى للجامعات
---
المكان: جامعة القاهرة – البوابة الرئيسية
الأوراق المطلوبة غالبًا:
- أصل وصورة شهادة الماجستير
- أصل وصورة شهادة البكالوريوس
- صورة البطاقة
- صورة شخصية
- فيزا للدفع
وممكن حد من أهلك يخلّص الإجراءات بدل منك عادي.
النظام زمان كان:
تدفع وتستنى من 14 لـ21 يوم علشان الاستلام.
لكن دلوقتي بقى فيه نظامين:
استلام فوري في نفس اليوم: حوالي 1070 جنيه
استلام بعد 14 يوم: حوالي 707 جنيه بالبريد على عنوان بيتك
---
بعد اعتماد المجلس الأعلى للجامعات
بعد ما تستلم ورقة الاعتماد، بتعمل خطوتين مهمين جدًا:
تطلع الدور الرابع عند دكتورة هناء علشان توقّع الورقة.
تروح الأكاديمية تسلّمها علشان تتختم تاني ويتم التوقيع على ظهرها من دكتورة أميمة.
وبعد حوالي أسبوع عمل تستلمها مرة تانية، وبعدها تقدر تطلع على توثيق الخارجية.
---
بعد ما تستلم ورقة الاعتماد من المجلس الأعلى للجامعات، هتلاحظ إن الورقة بتطلع بالعربي حتى لو الـ MBA باللغة الإنجليزية.
وده لأن الاعتماد الرسمي في مصر بيكون باللغة العربية، لكن بيُذكر فيها إن الدراسة تمت باللغة الإنجليزية.
لو عايز توثقها من الخارجية:
بتروح مكتبهم في الميريلاند.
تكلفة التوثيق للشهادة الواحدة حوالي 130 جنيه.
وكمان تقدر توثق:
بيان الدرجات
شهادة التخرج
أي أوراق إضافية محتاج تعتمدها
---
السفارة
آخر خطوة لو هتستخدم الشهادة خارج مصر
بتروح سفارة الدولة اللي هتشتغل فيها بالشهادة بعد توثيق الخارجية، علشان السفارة كمان تعتمدها وتختمها.
وبعدها تقدر تقدم بالشهادة في أي جهة أو دولة حسب احتياجك
وأهم نصيحة فعلًا:
ما تعتمدش اعتماد كامل على سؤال الموظفين، لا في الأكاديمية ولا في جامعة القاهرة
لأنك غالبًا هتفضل رايح جاي بين المكانين.
أنا لسه مخلصة الرحلة دي مؤخرًا…
فحبيت أنقل لكم التجربة كاملة يمكن توفر على حد وقت وتعب
وبالتوفيق لكل الخريجين
.png)
.png)
0 تعليقات